يا حليل زمان و ايام زمان
خش اللبن
...........................
خش اللبن واستخلاص الفرصه / الزبده ..
وزي ماقال عمنا الشاعر كدكي (تموع البت بلا الفُرصه وتعال شوفلك جنس جرسه)
الحاجي من جاء اللبن وفورتو وختتو لامن برد وكبتو في ماعون كبيير (حله .. جردل .. قرعه : بربوره :) كانو يسموهو ( الكادق ) وكبت عليهو شوية رواب ورفعتو في المعلاق ( المشلعيب ) تجيب السعن تغسّلو سممح عشان ريحتو ماتتغير وتبلو في طشت تجي الصباح وهو ليين تمرقو وتفتش ان بقا فيهو خُرم تقوم ترقعو بي قطعة قرعاي ولا طحنقال ( حجر حصحاص ) تدخلو من جوه وتعقد عليهو وكتيير نسمع الواحد يقولك ساو نخرتك زي عقدة السعن يعني مكرضمي .. اها تجيب المرابنات حقاتها ( الكشمبير ) وهن فد اسم بس المعلومه الرايحي من الناس يقولو مرابنات لو سعن لبن وكشمبير لو سعن مويه ودا عاده بيكون مصنوع من حطب شجر السنط او السلم وتتكون من تلاته عيدان ومربوطات من فوق وتكون ( حرة الحركه ) يسهل جمعها وفردها حسب الحوجه . اها اماتنا ماكانن قعد يكوركن الفزع وألحقوني افتحولي السعن اللحقن اللبن ! تكجر السعن بين كريعاتها وتفتح خشمو بي سنونها وتكب اللبن وترفعو في المرابنات وتنفخو وتخت بنبرها المهتوك المو خمج وتلقاها ماسكي المرابنه بي ايدها اليسار وتهز في السعن بي ايدا اليمين ومره مره تفتح السعن تشوف الدهنايي نعل ماها طاشي اوول ماشافتها اتلمت تقولك اللبن مرق وتديهو كوز مويه عشان تنجمع سمح وتطلق خشم السعن تنفّسو وتكبو وتجمع الدهناي تدردما سميح زي ا لفي الصور دي عشان بعدين تسيحها وتسويها سمن اما الروب يوزعوهو للجيران ..بالنسبه للصوص الكان بعد يجو من المدرسه يلحقو حلة اللبن ويهجمو علي الجمودي ياكلوها خلو الطابق مستور😃
.
#منقول
ليست هناك تعليقات:
إرسال تعليق